Rexhep Ahmeti, kandidat i PS për kryetar të komunë së Mitrovicës

Shprehi gatishmërinë dhe sigurinë për ta drejtuar komunën e Mitrovicë me një POLITIKË NDRYSHE nga kjo që është tani, ashtu siç më obligon Programi i Partisë sime...

Mitrovicë, 31 korrik 2009

I jam mirënjohës Partisë Socialiste në Mitrovicë dhe Kryesisë së PSK-së në Prishtinë që më kanë nderuar me këtë kandidaturë të sotme, duke më dhënë kështu mundësinë që të dal publikisht para qytetarëve të nderuar të Mitrovicës dhe t’u ofrojë kontratën time për ta drejtuar së bashku me ta Komunën e Mitrovicës dhe jetën e përbashkët këtu.
Programi i PSK-së na jep mundësi të shkëlqyeshme që ta bëjmë më të mirë se që është tani jetën e qytetarëve tanë të shumëvuajtur.
Shprehi gatishmërinë dhe sigurinë për ta drejtuar komunën e Mitrovicë me një POLITIKË NDRYSHE nga kjo që është tani, ashtu siç më obligon Programi i Partisë sime. Këtë mundësi e kemi tani ne pasi jemi parti e re e profilizuar qartas. Slogani ynë politikë ndryshe është real dhe jo vetëm parullë zgjedhore. Nocioni POLITIKË NDRYSHE i PSK-së është i tillë që të mos mashtrohet elektorati. Që votuesi të mos respektohet vetëm derisa t’i merret vota, e pastaj të harrohet, por vullneti dhe interesi i votuesit të jetë ligj për të votuarin.
Çështja kryesore që më ka motivuar që të hyjë tani në politikë, ka qenë: a kemi kënd ta votojmë? Tani e kam përgjigjen: Elektorati i Mitrovicës ka kënd ta votojë - Partinë Socialiste të Kosovës, e cila ka në Programin e saj rregullimin e çështjes social-ekonomike të shtresave në nevojë, të të papunëve, të atyre që janë të diskriminuar materialisht edhe pse punojnë. Do të angazhohem për të drejtat ligjore të të gjithë qytetarëve të Mitrovicës. Programi im elektoral, të cilin e kam në përfundim e sipër, i përfshin të gjitha këto përcaktime që i ceka më lartë dhe në kohë të duhur do të jetë në duart e qytetarëve të Mitrovicës.
Qeverisja ime, si kryetar i Komunës së Mitrovicë, do të ishte duke respektuar Kushtetutën e Kosovës dhe duke drejtuar Komunën sipas vullnetit legjitim të qytetarëve me një shkallë të lartë të vendimmarrjes së tyre për të gjitha çështjet e jetës publike, ashtu siç na obligon Karta Evropiane për vetëqeverisje lokale. (Neni 1 pika 2 e Kartës)
Për të pasur mirëqeverisje në Komunën tonë duhet punuar në bazë të ligjeve dhe parimeve etike administrative dhe jo bazë të parimeve të xhepit.
Për ta ndryshuar qeverisjen e tashme në Komunën tonë i ftoj të dalin në zgjidhje të gjithë qytetarët e Komunës së Mitrovicë me të drejtë vote, pa marrë parasysh përkatësinë e tyre etnike, politike e ekonomike. Vetëm të gjithë së bashku: shqiptarët, serbët, boshnjakët, malazezët, turqit, romët, egjiptianët, apo gjithsecili në harmoni me gjithsecilin qytetarë të Komunës sonë, mund ta përmirësojmë jetën tonë në Komunë. Me Kushtetutën e Republikës së Kosovës, Kosova është përkushtuar për krijimin e një shteti të qytetarëve të barabartë, i cili do të garantojë të drejtat e secilit qytetar, liritë qytetare dhe barazinë e të gjithë qytetarëve para ligjit.
Kështu jam i përcaktuar, pa hezitim, edhe unë dhe kështu do të veprojë nëse qytetarët e Komunës sonë më përgjigjen pozitivisht dhe më japin besimin për t’iu prirë atyre në drejtimin e përbashkët të punëve tona të përbashkëta në Komunën e Mitrovicës.