Lidhur me editorialin e “Shqip” – Tetovë, më 19.04.2008

Kur të etiketojnë armiqtë

Fazli VELIU

Reagim ndaj tendencës për denigrimin e figurës atdhetare të Fazli Veliut

Ditë më parë, me 17 prill 2008, gazeta e njohur "Shqip", pa dyshim njëra ndër më autoritaret e shtypit të shkruar në Shqipëri, përmes një shkrimi, të një autori të panjohur, saktësisht të paemër, mjerisht, në kundërshti me vlerat e saj, botoi një shkrim denigrues ndaj profesor Fazli Veliut, deputet në Kuvendin e Maqedonisë. Sipas "dokumentave sekretë" që i janë afruar gazetës "rezulton" se një deputet shqiptar në parlamentin e Maqedonisë, Fazli Veliu, ka qenë bashkëpunëtor i shërbimeve sekrete jugosllave deri në vitin 1996.

Për të bërë sa më " të dëshmuar" këtë pohim, gazeta e sipërme boton edhe dy faksimile, që i janë afruar asaj, sipas të cilave "vërtetohet" saktësia e dokumentave që janë sjellë në dëshminë e tyre.

Nuk e di burimin i cili i është afruar gazetës për ti servirur këto " dokumenta" . Sipas një verifikimi të bërë këto ditë, ky material, i ardhur nga një parti shqiptare në Maqedoni, PDSH, u është afruar edhe disa organeve të tjera të shtypit në Tiranë e ndoshta edhe në Kosovë. Fakti që është botuar si i paemër në gazetën "Shqip", ndryshe nga sa është tashmë traditë në këtë gazetë serioze dhe me tepër prestigj, na bën të mendojmë se, në mos tjetër, botuesi është viktimë e dokumentave të servirur si origjinalë dhe të saktë, e po ashtu, edhe të shkallës së paktë të njohjes së aktivitetit të gjatë, tepër serioz dhe në struktura shumë të rëndësishme të profesor Fazli Veliut.

Të nesërmen e botimit të këtij shkrimi unë iu drejtova një mikut tim, i cili është gazetar i respektuar në këtë gazetë, për të i qartësuar se në rastin e figurës së cituar është bërë një gabim i ndjeshëm, lajm i cili, megjithëse është i pabesueshëm për shqiptarët që e njohin nga afër apo nga larg Fazli Veliun, sjell një ndjenjë jo të mirë ndaj gazetës së mirënjohur "Shqip".

Nuk e di nga janë nisur botuesit e këtij materiali, i cili, në mos tjetër, për nga vetë rëndësia dhe pesha që mbart, duhej të saktësohej, pasi, në ditët e sotme, kur gjithçka është e mundur, fare lehtë, mund të konvertohen dokumentë të tillë, sidomos nga ata që kanë pasur lidhje të vërteta me shërbimet e fshehta të sigurimit jugosllav apo serb.

Fazli Veliu nuk është i ri në politikën shqiptare. Në të kundërtën ai është një emër shumë i njohur, jo vetëm si figurë atdhetare, por edhe njerëzore. Për shumë vite me rradhë ai ka qenë një ndër figurat më të spikatura të lëvizjeve ilegale në Kosovë dhe jashtë saj, madje, për disa vite edhe drejtuesi i lëvizjes ilegale Lëvizja Popullore e Kosovës, e cila është themeluese dhe drejtuese e ushtrisë Çlirimtare të Kosovës. Fazli Veliu ka patur meritën që të jetë njëri ndër themeluesit dhe emërtuesit e Ushtrisë Çlirimtare të Kosovës për vetë pozicionin që ai ka pasur, ka qenë në lidhje me strukturat drejtuese të këtij formacioni të madhërishëm që në momentet e para dhe deri në përfundimin e luftës; ka marrë pjesë direkte në hartimin e strategjive dhe ngritjen e strukturave politike e ushtarake të saj, gjithnjë përmes një sektori të veçantë, i cili drejtohej nga Xhavit Haliti "Zeka" dhe ku bënin pjesë edhe Ali Ahmeti"Abaz Gjuka", Jashar Salihu, e më pas edhe Azem Syla "Daja i vogël ose Antoni". Pra ai ka qenë në që fillimet e ngritjes së strukturave ilegale të luftës në Kosovë, dhe në se, qoftë edhe për një moment do të ishte i saktë materiali i paraqitur si i tillë, dëmet dhe pasojat në rradhët e Ushtrisë Çlirimtare të Kosovës do të kishin qenë të pallogaritshme.

Fazli Veliu, i njohur edhe si "Daja i madh" ose edhe shkurt "Daja", ishte njëri ndër autoritetet politike të lëvizjes ilegale LPK që kishte lidhje të fuqishme me studentët në Prishtinë, gëzonte respektin e tyre dhe i dëgjohej fjala, ndoshta më fort se shumë të tjerëve. Disi i butë në shpirt, romantik për nga natyra, poet dhe gazetar, njeri që beson shpejt dhe që mbahet fort pas fjalës së dhënë, në rrugëtimin e tij të gjatë politik, si gjithë të tjerët, ai mund të ketë bërë edhe gabime ose lëshime, mirëpo, askush, e theksoj, askush, për asnjë çast, edhe kur ka pasur goditjet më të ndjeshme në rradhët e organizatës dhe të strukturave të luftës, nuk ka hamendësuar se pas tyre mund të ishte një figurë si Fazli Veliu. Për më tepër, pas goditjeve që kanë ndodhur, sidomos në dhjetor dhe në maj 1997, një komision i posaçëm, ka verifikuar punën e të gjithë shokëve dhe strukturave të lidhura ma ndodhitë e luftës, por askush, në asnjë rast dhe asnjëherë, as që ka ngritur dyshimin më të vogël për figurën e Fazli Veliut. Pasi ka qenë tepër e qartë figura e tij, dhe në të njëjtën kohë, pasi njohuritë e tij kanë qenë tepër të gjëra që mund të kishin sjellë pasoja tepër të mëdha.

Atëherë pse është synuar të përbaltohet figura e Fazli Veliut dhe të përfitohet nga faqet e hapura të gazetës autoritative "Shqip".

Si e thashë, një material, pak a shumë i tillë, ka ardhur nga një parti politike në Maqedoni dhe koha që është zgjedhur, ashtu si edhe objekti i përcaktuar, ngjan si dy pika uji me ato që kanë ndodhur edhe para fushatës së fundit të zgjedhjeve parlamentare në Maqedoni. Aso kohe, Menduh Thaçi, pat hedhur dhe lançuar tezën se pas arrestimeve të ndodhura në lëvizjet ilegale dhe ngjarjeve të dhimbshme që lidhen me zhvillimin e saj, qëndron Ali Ahmeti, lideri politik i BDI. Ai citoi edhe dokumenta që nuk ekzistonin, të Shtabit të Përgjithshëm të Ushtrisë Çlirimtare të Kosovës. Edhe tani, mendoj se jo rastësisht, në lajmin e dhënë se një deputet shqiptar rezulton të ketë qenë bashkëpunëtor i shërbimeve sekrete jugosllave, është dhënë dy herë fakti se Fazli Veliu është daja i Ali Ahmetit, drejtuesit të BDI. Në të vërtetë ky është synimi edhe i gjithë kësaj loje politike. Zakonisht, në traditën e herëshme, është nisur nga nipi për të shkuar tek daja, tani, ndodh e kundërta, po nisen nga daja për të shkuar tek nipi.

Jam i bindur se njeriu, i cili ka përgatitur dhe servirur këtë material si të saktë dhe origjinal, ka pasur lidhje të herëshme pikërisht me strukturat në të cilat mbulohet tashmë, roli i të cilit ka qenë pikërisht ai që po luan sot, përçarjen dhe denigrimin e mendimit të përbashkët politik të shqiptarëve që jetojnë në trojet e tyre në Maqedoni.

Ndërsa, përsa i përket "faktit " se Fazli Veliu është "shpërblyer" për punën e tij me 8.621 marka gjermane, do të ishte e tepërt të ndaleshim. Për pozicionin që ka pasur dhe detyrat që ka ushtruar, ai, në se do të ishte dikush tjetër, do të kishte përfituar dhjetra e ndoshta qindra herë më shumë, gjë që mrekullisht nuk ka asgjë të përbashkët me figurën e tij dhe gjithë jetën e tij.

Fazli Veliu është njëri ndër figurat më të nderuara dhe të respektuara të lëvizjeve ilegale çlirimtare në Kosovë dhe viset e tjera shqiptare në ish Jugosllavi. Ishte një kohë që atë e akuzonin për lidhjet e ngushta që kishte me Familjen Jashari dhe familjet e tjera të luftës, tani, ndoshta të njëjtët, përmes shpërdorimit të besimit të një gazete prestigjioze, e akuzojnë për të kundërtën e asaj që i është përkushtuar.

Në të gjithë këtë histori, ajo që edhe për një kohë do të mbetet, është ndjenja jo e mirë përse një gazetë kaq e besueshme u ngut me një çështje krejtësisht të pabesueshme.
 

(Autori i këtij reagimi është: ish-kryetar i Lëvizjes Popullore të Kosovës dhe kryetar i Komisionit të veçantë për Verifikimin e Ngjarjeve të Luftës në Kosovë.)

Dokumenti i gjoja shërbimeve sekrete se “Fazli Veliu është spiun i serbëve”, është i falsifikuar

Ibrahim KOÇA

Kërçovë

Marr parasysh shkrimin e gazetës së Tiranës “Shqip” e cila ditë më parë botoi një editorial me titull “Një deputet shqiptar, spiun i serbëve” dhe që shkrimi i njëjtë u botua ditë më vonë nëpër disa gazeta në Maqedoni, janë arsyet që moralisht dhe kombtarisht më obligojnë që të bëj këtë artikull mua dhe shumë kolegëve të mijë gazetar, dhe që në mënyrë profesionale t’u përgjigjemi të papërgjegjshëmve. Si lexues, në shikim të parë vërejta plotë gabime brenda atij dokumenti që pretendohej se është dokument zyrtar i lëshuar nga shërbimet sekrete serbe, e në të cilin ishte bazuar gazeta. Ç’farë amatorizmi! Nëse këto gazeta bazohen në kësi dokumentesh të falsifikuar, atëherë nuk do të ngelet shqiptar i pastër mbi tokën dhe pa qenë spiun i serbëve. Dua t’ju them këtyre redaksive dhe opinionit shqiptar, se dokumenti i botuar në këta gazeta, ku aludohet se ai ka dalë nga kuzhinat e shërbimeve sekrete serbe, nuk të mbush mendjen se është i vërtetë, sepse ai dokument në vete përmban plotë gabime gjuhësore dhe kontradikta me data dhe shifra. Në dokument thuhet se “..... albanskih separatista na K i M u operaciji (separatistët shqiptarë në Kosovë dhe Metohij në operacion)” që në gjuhën serbe nuk thuhet dhe shkruhet ashtu, porse duhet të jetë “..... albanskih separatista u K i M na operaciji”, dhe në këtë rast nuk të bënë të besosh se ky dokument është i lëshuar nga shërbimet sekrete serbe. Madje, gabimi tjetër është, se dokumenti aludon të jetë i lëshuar me numër protokollar ku thuhet “strogo po. Br: 938” që është shënuar në krye të dokumentit, dhe në fund të dokumentit qëndron se ky dokument prapë thuhet “strogo po. Br: 939”, pra dy numra protokolli për të njëjtin dokument. Gabimi tjetër qëndron kur thuhet se “operativnu poziciju Instruktor*”, pra kodi “Instruktor*” shoqërohet me një fusnotë që më poshtë është deshifruar me Fazli Veliu, gjë që nuk korrespondon me format e deshifrimit të shërbimeve sekrete të cilat nuk japin fusnota siç është dhënë në këtë dokument që aludohet të jetë lëshuar nga shërbimet sekrete, porse kodet dhe shifrat janë të shënuar nëpër lista tjera ndërmjet atyre të cilët komunikojnë me to.
Gabimi tjetër është ku thuhet se “Fazli Veliu od selo Zajac (Fazli Veliu nga fshati Zaja(c)z)” që në realitet Fazli Veliu nuk është nga fshati Zajaz, por është nga fshati Kollarë. Gabimi tjetër në dokument është në datëlindjen e tij që nuk është 1 prill siç thuhet aty, porse Fazli Veliu ka lindur më 4 janar. Thua vallë, të gjitha këto gabime që mban dokumenti në fjalë të jenë bërë në një dokument zyrtar siç pretendohet aty. Për besë nuk mundem ta besoj, ashtu siç nuk mund ta besojë edhe opinioni i gjërë shqiptar, ashtu siç nuk e besojnë edhe vetë redaksitë e gazetave që e kanë botuar këtë dokument të falsifikuar. Të shpifësh në këtë formë amatoreske për njeriun i cili organizoi tre UÇK-të këto 15 vitet e fundit, është thjeshtë një papërgjegjshmëri morale. Të shpifësh në këtë formë për ideologun e Lëvizjes Popullore për Republikën e Kosovës LPRK, është një idiotësi e papërshkruar. Të shpifësh në këtë formë për shokun dhe mikun e idealit të Jusuf Gërvallës, Kadri Zekës, Fehmi Lladrovcit e shumë e shumë dëshmorëve të tjerë, është një antishqiptarizëm i paparë. Të shpifësh broçkulla të tilla, për njeriun të cilin shqiptarët e quajnë me nofkën më të ëmbël “Daja” do të thotë të jesh i pamoralshëm. Të shpifësh për një individ se është spiun i Serbisë, të cilit serbët i’a kanë vrarë dhe zhdukur gjysmën e familjes, është shpirtligësi.
Sido që të jetë, “Dajës “ i uroj shëndet të plotë she të na rojë për jetë e mot.

Reagim në shkrimin: “Një deputet shqiptar, spiun i serbëve", të botuar në "Shqip"  Tiranë, më 17 prill 2008

Shpifjet e turpit - Njeriu fisnik do t'i harrojë!

Shkruan: Fatmir BRAJSHORI

Sulmet e bëra kundra Fazli Veliut - Dajës nuk janë të rastësishme dhe nuk vijnë pikërisht në këtë kohë për hiq gjë! Jo! Ato bëhen nga ata të cilët po luajnë me kartën e tyre të fundit: spekulimin dhe lënien e " këmbëve të arushës" në duart e shqiptarëve, që pastaj po këta shqiptarë të merren me vetveten!
Atdhetarin e vërtetë nuk mund ta instrumentalizojnë shpifësit e gazetave enigmatike!
Atdhetari Fazli Veliu, paktin e tij e ka bë me Popullin shqiptar!
Si bir i tij i devotshëm!
Idiotizmi i atyre, që bënë këtë gjë, do të ndëshkohet nga mbarë kombi shqiptar - ani pse ata deshën të të mbërthenin me "këmishën e armikut të popullit", nëpërmjet gazetave aspak të popullit, për t'i bërë të tjerët të shikojnë tek ju "armikun e popullit".

Duke lexuar këtë gjë, për Njeriun e mendimeve të qarta, veprimeve, sugjerimeve, këshillimeve e mësimeve të çmuara, Fazli Veliun - më tronditi po njësoj, sikurse që e tronditi gjithë vetëdijen tonë Kombëtare.
Askush s'ka të drejtë të jetë indiferent, para kësaj shpifjeje me të cilën synohet jo të goditet Fazli Veliu si Individ - por një organizim i tërë, i një gjenerate atdhetarësh, të cilët u prinë të tri Luftërave të lavdishme të popullit tonë; në Kosovë, në Luginë të Preshevës dhe në Maqedoni...

Pra armiqtë e sukseseve shqiptare nëpërmjet shqip-folësve, legal dhe intelektual, të ndërsyer ndoshta edhe nga disa interesa personale dhe politike, tentuan të bëjnë linçimin Publik të Fazli Veliut - Dajës!
Por me këtë gjë ata bënë linçimin vetanak dhe personal!
Me këtë akt nënshkruan turpin e tyre të fundit! Ata përdoren, armiqtë e të gjitha kohërave, të njësuar në këto mbeturinat e tyre të fundit, filozofinë se më e tmerrshme është sulmi i trilluar, se sa, vet sulmi!
Ata që përgatiten furrën e druve për Fazli Veliun si në kohën e Inkuizicionit - do të digjen vetë në atë furrë! Edhe ashtu shpirti i tyre i prishur që në lindje gjatë tërë kohës ka qenë i tillë: i djegur!

Si e njoha Fazli Veliun - Dajën?

Në vitin 1993, bënim përgatitjen e Mbledhjes së Katërt të Përgjithshme të LPK-së dhe në kohën parapërgatitore, pasi mora rezolucionet e Mbledhjes jashtë vendit - në brendësi të materiale të ndryshme dhe lëndës për studim, hasa emrin e Fazli Veliut si i zgjedhuri i Parë i Lëvizjes Popullore për Republikën e Kosovës.

Mu ngjallë një dëshirë që ta njihja këtë njeri!
Nuk e kisha idenë, që vetëm disa ditë më vonë, pikërisht do të takoja Fazli Veliun, në Prishtinë në Mbledhjen e katërt të LPRK-së (që nga kjo Mbledhje në LPK-së), Njeriun që duke mos e njohur për së afërmi, e përshkruaja në veten time, e paramendoja në botën time, si shumë nga ata "mërgimtarë" të cilët: Atdhetarë PO - por rrethanat e kohës nuk u kishin ofruar mundësinë e arsimimit të bollshëm".
Por jo!
Ai që në takimin e parë, më bëri për vete, me zërin e tij të afërt, miqësor; me zërin e tij si të një shoku të devotshëm; me brengën e tij si të një babai të brengosur; me këshillën e tij si të një profesori të paanshëm!

Ishte viti 1993 dhe ndjehesha si Njeriu me vlerat më të mëdha në Kosovë ngaqë njihja Fazli Veliun!
Më vonë u takuam shumë herë në Tiranë, kur ai vizitonte shokët që jetonin atje dhe të cilët, u kishin shpëtuar burgosjeve nga ana e serbëve!
Gjithnjë tregonte një kujdes jashtë mase për gjithsecilin njeri e sidomos për ata që i takonin vegjëlisë!

Fazli Veliu ishte njeriu që me fjalën e tij të ëmbël, të qëlluar dhe të duhur, kurrë njëherë vetes nuk i krijonte armiq por përkundrazi - fjala e tij ishte mehlemë për secilën vrragë dhe secilën dhembje!
Kush mundë të harrojë brengën e tij për shokët, sakrificën e tij për Kombin, flijimin e familjes dhe interesave të ngushta personale?

Jo- Jo zotëri: Fazli Veliu nuk ishte nga ata njerëz që vetes dinte t'i thurte privilegje! Së paku "Daja" Jo! Nuk dinte dhe as që do të dinte ndonjëherë që për veten e tij të kërkonte ndonjë favor!
JO, përkundrazi ne të tjerët kërkonim favore nga ai!
Ai edhe atëherë kur punonim në redaksinë e gazetës "Zëri i Kosovës", nga meraku që shokët mund të jenë të lodhur, të rraskapitur - vinte me çantën e tij të mbushur plotë me lëngje, sanduiqe, apo edhe ndonjë ëmbëlsirë - që na i shpërndante, ani pse i vetmi ishte, pikrisht ai, në mesin tonë që "mbante çdo gjë mbi supe si Krishti dikur" për të mirën e Kombit dhe të shokëve natyrisht...

Dhe sot, sulmi ndaj Fazli Veliut nuk është i rastësishëm!
Hienat e dreqit duke ofenduar "Dajën" ofenduan çdo njeri të ndershëm; ofenduan çdo atdhetarë të devotshëm; ofenduan Luftërat e shqiptarëve për liri dhe bashkim Kombëtar; ofenduan çdo intelektual të ndershëm: më ofenduan edhe mua personalisht!
Ofenduan familjen time që pati nderi të ketë në konak jo vetëm Fazli Veliun, por shumë nga dëshmorët e kombit por edhe nga ata që sot udhëheqin me shtetin e Pavarur të Kosovës!
Kurrë nuk do të harrohet si është goditur dhe anatemuar Profesor Rexhep Qosja!
Simboli i rezistencës Kombëtare Adem Demaçi!
Çfarë nuk është thënë për ta!
Dhe pikërisht nga ata që shkruanin shqip dhe flisnin madje!

E njëjta gjë dhe e njëjta retorik e shpifjes vije nga kuzhina e njëjtë në rastin e Fazli Veliut!
O zot deri kur më do të mundohen këto hiena nate të përdorin akoma armën e tyre të vetmen dhe më të mirën që dinë të përdorin; përçarjen!
Por Fazli Veliu do të dijë të kapërcejë edhe këtë sfidë të radhës! Ai nuk është i vetëm në këtë betejë!
Me të janë vargu i pambarim i gjithë figurave të ndritshme të Kombit së bashku me ushtarët e ushtrive tona çlirimtare!
Ushtrive të cilave askush s'diti t’u gëzohej më shumë se vet ai që dha kontributin e tij në themelimin e tyre!
Po kush janë ata që sulmojnë Fazli Veliun?
Ata janë më shumë se fatkeqësi për vetën e tyre - fatkeqësi për kombin tonë!
Ata janë të cilët i njohim jo sot- por që moti! Janë të njëjtit që bënë punën e dreqit, në të gjithë kohërat, gjatë të gjitha Luftërave dhe të cilët përhapin thashethemet e tyre, pas çdo triumfi gjithshqiptar!
Janë ata të cilët provuan të godasin së pari Fazli Veliun! Ata të cilët hynë në eksperiment për të provuar suksesin e tyre fillestarë, që pastaj ta vazhdonin edhe me të tjerët!
Janë ata që ndoshta synim përfundimtarë kanë apo edhe do të kenë vet Njeriun e Aksioneve të mëdha Ali Ahmetin - Liderin e BDI-së!
Por të gjitha përpjekjet e tyre do të jenë të kota! Ne s'kemi besim në ata që besojnë në shpifjet dhe falsifikimet serbe, por ndoshta me porosi të shqiptarëve të cilët kanë interesat e tyre në gjithë këtë gjë!

Në Personin e Fazli Veliut është indi i kombit!
Ai do të dijë t’i sfidojë të gjitha "dënimet publike dhe shpifjet" e mundshme edhe të paparashikueshme ngaqë nuk është hera e parë që ballafaqohet me një gjë të tillë! Të gjitha sfidat i bëri me sukses gjerë më tani! Edhe kësaj radhe do ta kalojë ngaqë "trimi i mirë me shokë shumë" - thotë populli!
Njeriu ruhet nga Historia por jo nga shpifjet!
Duke e ditur që Fazli Veliu lexonte shumë, dispononte një kulturë të përgjithshme, Dije dhe Kulturë mondane s'do mend që ai kujton fjalët e Servantesit të madh që thoshte:
"Sharjet janë arsyet e mëdha për ata që s'kanë arsye"!

Reagim në shkrimin: “Një deputet shqiptar, spiun i serbëve", të botuar në "Shqip"  Tiranë, më 17 prill 2008

Një lajm serbisht nga gazeta "SHQIP"

Abdullah PRAPASHTICA

22 prill 2008

Pavarësisht se me Deputetin në fjalë, nuk njihemi së afërmi, të dhënave në këtë shkrim nuk ju besoj fare. Sepse dihet se ai ka qenë Kryetar i LPK, se ka qen në krye të Veteranëve të UÇK, se si familja e ti dhe ai ka bërë një jetë relativisht të mjerë sociale gjatë kohës shumë të gjatë të veprimit në kohën e ilegalitetit dhe se ka qenë i ndjekur nga regjimi titosit. Prandaj publikimi i një shkrimi të tillë që pretendon se ka dalë nga “burimet” e sigurimit jugosllav, jo vetëm se duhet marr me rezerva por duhet hedhur në tersi si një akt të ndyrë sllav të luftës speciale për të vazhduar me fushatën e intrigave për komprimitimin e personaliteteve të rezistencës shqiptare. Kuzhinat e Luftës Speciale të organeve të UDB-së jugosllave kanë zier helme të tilla për të gjitha personalitete e rezistencës, kështu që kjo nuk është ndonjë risi e madhe. Përveç që habit fakti se si sigurimi sllavo shovinist përsëri i ve në përdorim këto metoda të stërvjetruara dhe se megjithatë gjen hapësirë që këto intriga primitive të i publikon edhe në gazeta që shkruajnë shqip! Me që tregu i gazetarisë në gjuhën shqipe e ka lejuar këtë rast duhet pritur se së shpejti do të kemi një invazion të lajmeve të tilla serbe në shtypin ton! Në këtë shkrim nuk ka as një më të voglin argument se i akuzuari ka dhen çfarëdolloj informacioni apo qe ka ber çfarëdo veprimi për interesa të sigurimit jugosllav.

Të dhënat që prezantohen në këtë shkrim si “argumente” mund të fabrikohen për secilin njeri. Nëse një njeri – kushdo qoftë ai – ka vepruar si spiun i serbëve ai duhet të ketë vepruar në një mes konkret ku do të i spiunonte njerëzit me të cilët ka bashkëpunuar drejtpërsëdrejti dhe do të jepte informacione konkrete mbi aktivitetin patriotik të tyre apo të organizatës ku ka vepruar. Nga kjo lloj veprimtarie spiunazhi duhet të kenë rezultuar edhe zbulime, arrestime, gjykime apo dëmtime tjera të aktivitetit patriotik. As një lloj informacioni të tillë nuk epet në këtë shkrim. Si pas parimit themelor të së drejtës:”... as një njeri nuk mundet të shpallet fajtor me akuza ndaj ti, para se ato akuza ti vërteton gjykata përkatëse kompetente e cila i verifikon vërtetësinë apo pavërtetësinë e akuzave dhe e bën verifikimin e argumenteve të akuzës dhe kundër argumentimin e palës së akuzuar...”! Prandaj, botimi i një shkrimi të titull destruktiv në një gazetë publike dhe ribotimi i saj në gazeta e mjete tjera të informimit publikë si dhe përhapja e lajmeve të tilla të rrejshme në rrugë tjera verbale apo me shkrim, është një vepër e dënueshme penale me të cilën njolloset personaliteti, shkelen të drejtat e njeriut dhe nxitet përçarja dhe shqetësimi i opinionit. Nga sa u tha më lartë kuptohet se me këtë reagim nuk merret në mbrojtje vetëm viktima, pra person i akuzuar, por mbrohet parimi i pacenueshmërisë të personaliteti në këtë formë si është vepruar në këtë rast. Sidomos kur është fjala për një deputet të një parlamenti!

Qëllimi i këti shkrimi është edhe alarmimi i prokurorisë që të hap hetime ndaj të gjitha redaksive dhe njerëzve që kanë marr pjesë në shkeljen e të drejtave të njeriut në këtë rast dhe ne rastet tjera dhe që të ju tërhiqet vërejtja gjitha redaksive, gazetarëve dhe të gjithë njerëzve që nuk kanë të drejtë të marrin nëpër këmbë as ke me akuza kaq të renda duke u bazuar në burimet e armiqve. Kjo nuk do të thotë se të gjithë ata duhet të heshtin edhe kur akuzat e tyre vinë si rezultat ti gazetarisë hulumtuese që ato i bazon në fakte, dëshmi dhe argumente të bazuara juridike! Përkundrazi në këto raste ata duhet domosdo të reagojnë publikisht. Liria e shtypit është një nga gurët më të çmueshëm të lirisë dhe demokracisë, prandaj nuk guxon të kalon askush pa përgjegjësi konkrete nëse këtë liri e keqpërdor për të e cenuar të vërtetën me akuza të rrejshme! Njeriu është i pafajshëm deri sa të vërtetohet fajësia e ti dhe vetëm kur ajo fajësi të vërtetohet atëherë ajo mund të publikohet! Pra, kujdes! Mos përhapni lajme të rreme në dëm të shqiptarëve e në shërbim të armiqve!