Demonstratë kundër ndarjes së Kosovës - në mbrojtje të sovranitetit

Prishtinë, 19 nëntor 2008
Dhjetëra mijëra qytetarë kanë demonstruar sot në Prishtinë, kundër planit gjashtëpikësh të Ban Mi Munit dhe kanë bërë thirrje për mbrojtje të sovranitetit të Kosovës.
Demonstruesit thanë se plani i kreut të OKB-së është i papranueshëm për Kosovën, ngase zbatimi i tij do të thotë ndarje për Kosovën, e ndarja do të thotë luftë.
Demonstrata është organizuar nga rrjeti i organizatave joqeveritare dhe Lëvizja VETËVENDOSJE, e në të cilën kanë marrë pjesë edhe shumë figura politike..
Demonstruesit mbanin në duar flamurin kombëtar shqiptar, pankarte në të cilat shkruante “Jo ndarjes së Kosovës”, “S’ban, S’ki, S’mun”, (Ban Ki Mun), “Ta mbrojmë sovranitetin”, ndërsa brohoritjet më të shpeshta kanë qenë “Jo ndarjes së Kosovës”, "Ta mbrojmë sovranitetin”, “Jemi shtet, s’duam eksperiment”, “UÇK”, “Poshtë UNMIK-u”...
Demonstruesit janë grumbulluar para Bibliotekës Kombëtare, për të vazhduar marshutën përpara Kuvendit dhe Qeverisë së Kosovës dhe në fund përpara ish-selisë së UNMIK-ut, tani EULEX-it, duke përshkuar kështu trajektoren në formë të shkronjës S, që simbolizonte sovranitetin.
Lideri i Lëvizjes VETËVENDOSJE!, Albin Kurti u tha demonstruesve se edhe nëse liderët kosovarë e pranojnë në çfarëdo mënyre gjashtëpikëshin, populli nuk do ta pranojë atë. Kurti kundërshtoi neutralitetin e EULEX-it, duke e parë atë si një definicion që i mundëson Serbisë të ndërhyjë në çështjet e brendshme të Kosovës.
“Po thonë që ky farë EULEX-i është neutral. Ky neutralitet i bie njëfarë paanshmërie ndaj dy palëve. Pra, kur po thonë është neutral, po duan të thonë se për çështjen e Kosovës janë dy palë, është Kosova, por është edhe Serbia”, tha Kurti.
Në vazhdim, Albin Kurti kritikoi qëndrimin e krerëve të Kosovës përballë zhvillimeve të fundit politike, ndërsa planin katërpikësh të paraqitur dje nga presidenti Sejdiu, tha se e sheh si një mundësi që Kosova e Serbia sërish të hyjnë në negociata.
“E keni parë që dje ia kanë ofruar Daniel Friedit një plan katërpikësh. Mirëpo, ky plan katërpikësh do të përfundojë si qëndrim i palës kosovare në negociatat e ardhshme. Thonë, Serbia po i lyp gjashtë pika, ju po i lypni katër pika, hajde e zatetnu diku në mes. Prandaj, nuk mjafton më t’u thuhet ‘jo’ pikave të Ban Ki Munit, por duhet thënë ‘jo’ edhe çfarëdo negociate ose pazari me vendin tonë”, tha Kurti.
Xhavit Jashari, përfaqësues i shoqatave të dala nga lufta çlirimtare dhe veteranëve të UÇK-së, tha se çdo tentim për ta ndarë Kosovën do të ketë efekte edhe për vendet tjera të rajonit.
“Edhe nëse këto institucione, pa marrë parasysh arsyet, këtë ‘jo’ të sotme e bëjnë ‘po’ të nesërme, atëherë do të hapen probleme me të cilat do të përballen jo vetëm Kosova e Serbia, por do të përballen edhe Maqedonia, Mali i Zi, Shqipëria, do të përballen edhe Shqipëria e Greqia...".
"Pra, do të ketë ribërje të kufijve, sot ose nesër, jo vetëm në këtë pjesë të tokave shqiptare, por edhe më gjerë”, tha Jashari.
Alban Bokshi, nga OJQ “Çohu” tha se sovraniteti dhe integriteti territorial i Kosovës është i panegociueshëm. "Për secilën çështje kapitale për Kosovën duhet të vendosë populli i Kosovës, ndërsa referendumi është mekanizmi më i drejtë", tha ai.
Ndërkaq, Shpend Ahmeti nga Instituti për studime të avancuara, kërkoi që zëri i qytetarëve të mos ndihet vetëm një herë në katër vite, vetëm atëherë kur mbahen zgjedhjet, por edhe kur ata janë të pakënaqur me gjendjen aktuale politike në vend.
Demonstruesve u është drejtuar edhe udhëheqësja e Rrjetit të grave të Kosovës, Igballe Rugova. Ajo ka kërkuar nga institucionet e Kosovës që ta respektojnë në përpikëri nenin 1.1. të Kushtetutës së Republikës së Kosovës, ndërkaq nga Bashkimi Evropian kërkoi që të mos i përsërisë gabimet që i ka bërë UNMIK-u, gjatë këtyre viteve në Kosovë.
Demonstrata e sotme ishte ndër më masoviket që është organizuar pas përfundimit të luftës çlirimtare në Kosovë. Organizatorët e saj janë shprehur të vendosur për të vazhduar demonstratat nëse plani gjashtëpikësh i Ban Ki Munit pranohet dhe tentohet të implementohet në Kosovë.

Frid: Oferta e Prishtinës platformë e mirë për të ecur përpara

Nënsekretari amerikan i shtetit për çështje politike, Daniel Frid, pas takimit me presidentin Sejdiu, kryeministrin Thaçi dhe shefin e ICO-së, Fejf tha se pikat e paraqitura nga presidenti Sjeidu, përbejnë një platformë të mirë për të ecur përpara.
“Unë do të shkoj sot në Gjeneve për t’u takuar me Allen Le Roa nga Kombet e Bashkuara për të diskutuar hapat e ardhshëm. Por dua të them se kemi bazë të mirë për të lëvizur në mënyrë produktive“.

Fejt: Jemi të kënaqur me përkushtimin e Qeverisë për të bashkëpunuar me ne

Përfaqësuesi special i BE-së në Kosovë, Piter Fejt, u shpreh i bindur sot se gjërat do të lëvizin përpara dhe misioni i EULEX-it do të shtrihet së shpejti në tërë territorin e Kosovës.
Pas takimit me diplomatin amerikan dhe krerët e Kosovës Fejt tha se “si Union Evropian, mezi po presim shtrirjen e EULEX-it në tërë territorin e Kosovës. Jemi të kënaqur kur dëgjojmë përkushtimin e Qeverisë për të bashkëpunuar me ne, por edhe me Kombet e Bashkuara, për ta bërë të mundur këtë shtrirje. Kemi marrë qëndrimin e qeverisë për këto çështje dhe tani presim t’i implementojmë këto aranzhime“.

Thaçi: Do ta implementojmë planin e Ahtisarit

Kryeministri Hashim Thaçi tha sot se bashkëpunimi me partnerët amerikanë dhe ata evropian nuk do të mungojë as në procesin e shtrirjes së EULEX-it në Kosovë.
“Do të punojmë maksimalisht që gjithë këtë proces ta kalojmë bashkë, duke implementuar me përpikmëri planin e Ahtisarit. E kemi ftuar, i kemi dhënë përkrahje dhe do të bashkëpunojmë ngushtë me EULEX-in për shtrirjen e tij në tërë territorin e Republikës”, tha Thaçi.
Kryeministri Thaçi tha se i tërë ky bashkëpunim bëhet me qëllim që rendi dhe ligji të funksionojnë në tërë territorin e vendit dhe në këtë mënyrë të mos ketë funksionim të strukturave paralele në asnjë pjesë të Kosovës.