Kuçi: Prishtina nuk do të bëjë asnjë kompromis që shkel Kushtetutën e Kosovës

E martë, 11 nëntor 2008
“Prishtina zyrtare nuk do të bëjë kurrfarë kompromisi që shkel Kushtetutën e Kosovës dhe që cenon integritetin territorial të saj”, ka thënë zv/kryeministri Hajredin Kuçi në një intervistë për RTK-në. Kuçi tha se ky qëndrim do të mbahet deri në përfundim të bisedimeve për planin 6 pikësh të Ban Ki Munit, bisedime këto që po ndërmjetësohen nga vendet perëndimore.

Zyrtarët e qeverisë janë të vendosur që të mos lëshojnë pe para presionit ndërkombëtar lidhur me planin 6 pikësh të Ban Ki Munit, i cili në Prishtinë shihet si ndërhyrje në sovranitetin e Kosovës. Presidenti dhe kryeministri, mbrëmë e kanë hedhur poshtë propozimin, duke e paralajmëruar vazhdimin e bisedimeve për këtë çështje me partnerët ndërkombëtarë. Zëvendëskryeministri, Hajredin Kuçi, tha se qëndrimi i Prishtinës është i qartë dhe se nuk do të ketë kurrfarë kompromisi në dëm të Kushtetutës së Republikës së Kosovës. Sipas tij, kjo është vija e kuqe nga e cila, Prishtina zyrtare nuk mund të lëviz as në vazhdim të bisedimeve të tjera .
“Nuk do të ketë kompromis më pak se që është në Kushtetutën e Kosovës. Kushtetuta ka qenë vetë kompromis dhe çdo kompromis tjetër është një lloj bartje e sovranitetit dhe bartja e sovranitetit nuk mund të bëhet nga individ të caktuar por duhet bëhet ashtu si është paraparë në Kushtetutë. Unë jam i bindur se edhe bashkësia ndërkombëtare do të ketë mirëkuptim në këtë çështje “, tha Kuçi.

Numri dy i qeverisë tha se refuzimi që i bëhet planit 6 pikësh, nuk është refuzim ndaj vendosjes së misionit të EULEX-it, por nuk mund të bëhet shtrirja e EULEX-it duke legalizuar strukturat paralele në Kosovë.

“Ne ngutemi që EULEX-i të shtrihet sa më shpjet që është e mundur, por jo të shtrihet duke mundësuar ndoshta legalizimin e strukturave paralele apo krijimin e një realiteti që vështirë do të kthehej në pikën zero. Mbi të gjitha nuk dëshirojmë që të krijojmë iluzion që një pjesë e Kosovës po ndahet apo dikush që e ka fituar autoritetin mbi Kosovën ”, tha Kuçi.

Kuçi tha se Prishtina tashmë i ka ofruar propozimet e veta lidhur me planin, të cilat janë në funksion të ruajtjes së tërësisë territoriale të Kosovës, respektimit të Kushtetutës dhe të Planit të Ahtisarit. Sipas tij, refuzimi i planit do të vazhdojë nëse tentohet që të anashkalohen këto tri çështje.
 

EULEX-i, një vazhdues i UNMIK-ut

E hënë, 10 nëntor 2008
Përfaqësuesit e UNMIK-ut përkatësisht të OKB-së dhe Bashkimit Evropian kanë arritur marrëveshjen në parim me qeverinë e Serbisë për modalitetet e shtrirjes së EULEX-it në Kosovë dhe për bashkëpunimin e Beogradit me UNMIK-un në gjashtë pikat e Ban Ki-Moonit, shkruan gazeta "Zëri", duke iu referuar burimeve diplomatike perëndimore.
Bëhet fjalë për gjashtë fushat e specikifikuara nga letra e kreut të Kombeve të Bashkuara Ban Ki-Moon dërguar presidentit serb Boris Tadiq - policia, gjyqësia, doganat, kontrolli i kufirit, transporti dhe trashëgimia kulturore dhe fetare.
Gazeta pohon se gjashtë pikat e sekretarit Ban "janë bashkuar" me kushtet prej tri pikave të Tadiqit rreth EULEX-it, duke "rezultuar me një marrëveshje", e cila pritet të prezantohet nga kreu i OKB-së në raportin periodik për Kosovën nesër, më 11 nëntor.
Burime diplomatike po ashtu i kanë thënë kësaj gazete se marrëveshja është "plot dykuptimësi" dhe mund të bëhet "burim mosmarrëveshjesh", kurse EULEX-i do të jetë një "vazhdues i UNMIK-ut".
Në numrin e sotëm "Zëri" boton edhe Marrëveshjen e UNMIK-ut me Qeverinë e Serbisë sipas gjashtë pikave të Ban Ki-Moonit.

Barack Obama ka fituar në zgjedhjet presidenciale amerikane. Në fjalimin e fitores, Obama tha se në Amerikë ka ardhur ndryshimi. Senatori demokrat nga Illinoi fitoi të paktën 338 vota elektorale, ndërsa rivali John McCain 156.