Plani 6 pikësh i Ban Ki Munit po i imponohet Kosovës. Këto 6 pika e fusin Serbinë thellë në territorin tonë. Kosova ndahet përbrenda, ndërsa EULEX-i do ta menaxhojë këtë ndarje. Me këtë plan po shkelet vullneti i popullit të Kosovës për një shtet të pavarur dhe po rrezikohet integriteti territorial i Kosovës. Ky plan ia pamundëson Kosovës që të funksionojë si shtet demokratik dhe të zhvillohet ekonomikisht.

Misioni i EULEX-it do të zbarkojë në Kosovë sipas planit 6 pikësh të Ban Ki-Munit përkundër JO-së që i tha Kosova. EULEX-i po vjen në Kosovë nën Rezolutën 1244 dhe nën ombrellën e UNMIK-ut. Ai po vjen pas marrjes së pëlqimit të Serbisë, neutral ndaj statusit, pra kundër pavarësisë së Kosovës. EULEX-i do të ketë pushtet ekzekutiv përmbi institucionet e sigurisë, sundimit të ligjit dhe atyre doganore të Kosovës. Ky mision nuk do t’i nënshtrohet ligjit dhe do të ketë imunitet nga ndjekjet penale në Kosovë. Ai nuk do të na jep llogari neve. Prandaj ky plan dhe ky mision duhet të refuzohet në tërësi dhe pa asnjë kompromis. Ky plan duhet të refuzohet jo vetëm duke i thënë JO, por duke përmbushur vullnetin e qytetarëve të vendit për një Kosovë të pavarur dhe sovrane. Ashtu siç është përcaktuar në nenet 1.1 dhe 2.1 të Kushtetutës ku përcaktohet që Republika e Kosovës është shtet i pavarur, sovran, unik dhe i pandashëm, përkatësisht, që sovraniteti i saj buron nga populli.

Ne kërkojmë që të jemi një vend normal, një vend demokratik ku për çështjet madhore vendosin qytetarët përmes referendumit. Ne kërkojmë që Kosova të jetë si vendet tjera të pavarura që qeverisen nga institucionet sovrane të zgjedhura nga populli, të popullit dhe për popullin. Pakicat e Kosovës janë qytetarë të Kosovës, të drejtat e tyre janë të garantuara me konventa ndërkombëtare të cilat merren parasysh në tërësi në Kosovë. Ne duam zhvillim e përparim politik, ekonomik dhe social e jo ndarje e negociim të vazhdueshëm të asaj se çfarë do të jetë Kosova.

Institucionet e Kosovës nuk duhet ta kenë Planin e Ahtisaarit si pozitë politike në kohën kur Serbia nuk e njeh pavarësinë e Kosovës dhe i mban strukturat paralele në Kosovë. Ky plan e ndan Kosovën në vija etnike, si në institucione ashtu edhe në territor. 6 pikat janë suplement i planit e jo në kundërshtim me të.

Ky vend është i yni, i të gjithë qytetarëve të Kosovës, dhe përgjegjësi e jona. Është absolutisht e papranueshme që për Kosovën të merret leja në Beograd. Shteti i Serbisë duhet të largohet nga këtu për të mos u kthyer kurrë. Propozimi i Serbisë nxit ndarje të reja në Ballkan.

I ftojmë të gjithë qytetarët e Kosovës që të na bashkëngjiten në demonstratë dhe të kundërshtojnë në mënyrë paqësore 6 pikat që prekin sovranitetin dhe integritetin territorial të Kosovës.

Ta bëjmë zërin tonë të ndëgjohet! Të martën, me 2 dhjetor, të gjithë në Prishtinë.

Ta mbrojmë Republikën e Kosovës shtet të pavarur, sovran, demokratik, unik dhe të pandashëm!