ZIKPRESS	Seanca plenare e Kuvendit të Kosovës

Diskutimi i deputetit të Lëvizjes Popullore të Kosovës (LPK), Emrush Xhemajli, në seancën plenare të Kuvendit të Kosovës për punën e Grupit të Kosovës për çështjen e statusit

Prishtinë, 24 mars 2006

I respektuari kryetar i Kuvendit,

Të nderuara zonja dhe zotërinj,

Anëtarë të Grupit të Kosovës për Statusin e vendit, megjithëse s’qenkan krejt dhe i bashkëngjitëm asaj çka tha z.Xhavit Haliti

Të respektuar të pranishëm,

Si deputet dhe përfaqësues i LPK-së, u bashkëngjitëm përpjekjeve për një Kosovë të shkëputur nga Serbia, të aftë të qeverisë vetveten në nivel qendror e lokal dhe në bashkëpunim me bashkësinë ndërkombëtare të arrijmë atje ku jemi nisur. Në Kosovë askush nuk mendon që të shkojmë në Europë me disa robër që nuk guxojnë të lëvizin në Kosovë dhe as me qytetarë të rendeve të ndryshme dhe të diskriminuar herë negativisht në dëm të pakicës apo herë pozitivisht në dëm të shumicës, por të jenë të gjithë të barabartë para ligjit.

I përshëndes përpjekjet e Grupit të Kosovës për Statusin dhe për aq sa u tha nga z.Haziri. Sa është i suksesshëm grupi i Kosovës, kjo do të shihet në fund. Është përgjegjësi e madhe dhe e di se nuk është e lehtë pozita e Grupit tonë. Pozita e vështirë e Grupit buron nga vet statusi i pa qartë i vendit, i mbajtur me premtime se do të bëhet mirë, përballë palës serbe e mbështetur nga struktura shtetërore e saj e njohur ndërkombëtarisht. Përsëri diskutohet nga agresori vetëm fati i viktimës, i Kosovës. Ndërkaq, fati i agresorit mbetet i garantuar, i pacenuar e i padiskutueshëm. Dhe të gjithë po e shohim, se Serbia aq sa ka fuqi pamëshirë po punon për të dëmtuar vendin tonë. Të gjithë po e shohim se ndërmjetësuesit ndërkombëtar po i bëjnë presion  kryesisht viktimës, ndërsa agresorit po i bëhen favore të njëpasnjëshme dhe si rrjedhim delegacioni ynë e ka pasur dhe do ta ketë edhe më vështirë në të ardhmen.

Duke i mirëkuptuar të gjitha vështirësitë, që dihen e që nuk dihen, të Grupit për Statusin e vendit dhe duke pasur parasysh se janë adresuar shumë lavdata e vetëlavdata të grupit, ju lutem më lejoni që t’ua adresoj edhe disa vërejtje dhe rekomandime, të cilat mendoj se do të ishin të dobishme për të pasur sukses në bisedimet për shkëputje definitive nga Serbia.

Delegacioni i Kosovës për mendimin tim nuk i është përmbajtur mandatit që i ka dhënë ky Kuvend në disa drejtime.

Në këtë mandat nuk përfshihen bisedimet me Serbinë për çështjet e organizimit të brendshëm të Kosovës, siç është riorganizimi i pushtetit lokal apo decentralizimi, siç po thuhet, për territorin e Kosovës ende pa asnjë garanci zyrtare për statusin e pushtetit qendror të vendit.

Delegacioni i Kosovës nuk ka sqaruar organizatorin se ndjehet dhe është i pabarabartë dhe nën presion të paarsyeshëm në këto bisedime në mirëbesim, ndërsa Serbia është e favorizuar, është e shpërblyer në vend të dënimit për obstruksion, kur bisedon me Kosovën për çështjet e organizimit territorial të Kosovës në raport me vendet fqinje Serbia është e favorizuar, këtu shtetet fqinje kanë shumicë e pakica tjera në Kosovë, si vendet në rajon Bosnja e Turqia. Ky është presion në mirëbesim dhe lojë jo ferr që nuk ndihmon stabilitetin politik dhe të sigurisë në Kosovë.

Serbia ende nuk ka bërë asnjë deklaratë paqe me Kosovën dhe për Kosovën dhe t’i lejohet nga delegacioni i Kosovës që të rikthehet në këto çështje. Kjo nuk ka domethënie tjetër pos një lloj pranimi të nënshtrimit. Serbia në heshtje po siguron prezencë në Kosovë dhe vendi ynë përsëri rrezikon të mos i kalojë caqet e autonomisë. Andaj Serbia është deklaruar se nuk është për ndarje të Kosovës. Tek e fundit pse të ndahet diçka që po gjen formë për ta mbajtur të tërën, plus për ta  ndarë në formë tjetër të autonomisë për komunitetin serb në kuadër të autonomisë së Kosovës. Megjithatë, deri më tash Grupi i Kosovës për Statusin është duke u prezantuar sikur gjoja Grupi ynë ndjehet i barabartë me delegacionin shtetëror të Serbisë, siç u pa e dëgjuar edhe këtu.

Delegacioni i Kosovës gjithashtu nuk ka reaguar, madje as nuk ka sqaruar në bisedime dhe as publikisht skandalin diplomatikë në këto bisedime. Është marr vesh se në delegacionin serb marrin pjesë edhe dy anëtarë që janë zyrtarisht funksionarë të lartë të Kosovës dhe që paguhen nga buxheti i Kosovës, ndërsa qëndrojnë kundër dhe në anën tjetër të delegacionit të Kosovës. Kjo është fyerje poshtërim në adresë të Kosovës, ndoshta edhe e pa qëllim nga organizatori dhe UNMIK-u që e mundëson këtë. Cili vend do të lejonte këtë? Po e shohim se për do veprime financiare, dakord, në kuadër të Kuvendit po punohet të ketë transparencë, ndërsa për këto skandale diplomatike në Vjenë, krejt të hapura, heshtet si ka mundësi kjo ju lutem?

Siç është duke rrëshqitur situata me heshtjen e delegacionit të Kosovës vendit po i vazhdohet statusi i paqartë dhe po i afrohet edhe një periudhë e turbullt, shumë e vështirë, që nuk mund të garantojë zhvillim dhe përparim të vendit. Është tepër gabim që paraprakisht të thuhet se ne nuk do të dalim nga bisedimet. Në rast se Kosovës nuk i garantohet shkëputja e qartë nga Serbia do të ishte tragjedi dhe bisedimet edhe nëse nuk dilet nga to nuk do të kishin kuptim, ndërsa marrëveshjet nuk do të gjenin zbatim.

Le të thotë kush çka të donë, këtu por edhe ku të dojë, edhe pse e ka thënë rastësisht e pa dashje z. Besnik Mustafaj, ministri i punëve të Jashtme të Shqipërisë, e ka thënë një të vërtetë shumë të madhe. Po u prek kufiri i Kosovës, në favor të Serbisë, askush më nuk mund të garantojë kufijtë në pjesët tjera të Kosovës, por edhe të vendeve tjera afër saj.

Heqja dorë e Kryesisë së Kuvendit këtu nga një debat pak më i gjerë dhe jo i kufizuar në 10 minuta, si dhe heqja dorë e Kryesisë së Kuvendit nga debati tjetër për peticionin e rregullt të 46 mijë qytetarëve të Kosovës, që për kërkesë ka krijimin e Unionit shtetëror Shqipëri Kosovë, ka lënë vend për atë që po e dëgjojmë se, gjoja në Kosovë, nuk ka pasur dhe nuk ka tjetër projekt pos për pavarësinë e Kosovës.

Ndërsa dobësi shumë e madhe e pjesëtarëve të Grupit të Kosovës për Statusin është propaganda dhe analizat, paraqitjet e pakursyera të tyre për sukseset në bisedime, ndërsa Kryesia e Kuvendit matet, siç e pat se si dhe qysh të debatohet këtu në Kuvendin e Kosovës. I kisha thirrur anëtarët e Grupit të Kosovës për Status, sidomos koordinatorin që nuk qenka dhe s’e ka pa të arsyeshme të vijë këtu, për çështje teknike, që në bazë të prezantimit publik, nuk po del se është vetëm për çështjet teknike, që të lërë detyrat për çka nuk janë ngarkuar, fushatat me publikun, fushatat për t’ia mbushur mendjen këtij të fundit se kanë arritur suksese dhe s’po i kuptohen, sepse të jeni të bindur se atje, jashtë zyrave të institucioneve, do ta kemi vështirë dhe do të dëmtoni vendin. Atje, siç e keni parë, ju pret populli i uritur dhe i pakënaqur me stërzgjatjen e situatave, ju presin Lëvizjet prej më të ndryshmeve politike. Dhe nëse nuk ndaleni do të jemi edhe ne në këto mediume dhe prej andej gjithë çështja mund të bartet në rrugë. Ju jeni zgjedhur që të keni sukses në bisedimet me bashkësinë ndërkombëtare dhe jo në bisedimet me shoqërinë civile apo me popull, për këtë jemi zgjedhur ne më duket.

Pasi është zgjedhur nga Kuvendi, pra nga një institucion, Grupi i Kosovës për Statusin ka rrëshqitur në pronarë tjerë. Është bërë pronë e partive politike, pra jo më e institucioneve. Ja fakti. Në grupin e nivelit të dytë ndihmës janë dërguar përfaqësues të partive politike që janë pjesëmarrës në këtë grup, ndërsa nuk është caktuar askush nga Kuvendi i Kosovës edhe nga kryeministria, kjo është fakt.

Meqenëse partitë politike dominojnë jetën e Grupit të Kosovës për Statusin ato nuk u interesuan fare që ky grup të raportojë në Kuvend, po duket.  Andaj u shty edhe kjo seancë dhe u pretendua që të shtyhet në një tjetër. Pse. Sepse partia është e informuar, për deputetët e kuvendit, kush po ndien. Raportimet dhe rekomandimet bëhen nëpër parti.

Të nderuara zonja dhe zotërinj deputetë,

Propozoj që Kuvendi i Kosovës të aprovojë këto rekomandime për Grupin e Kosovës për statusin e vendit.

Bisedimet të jenë jo sekrete, (po qarkullojnë materiale që e kanë edhe këtë emblemë lartë, si sekret, topsekret.., kjo nuk është bash në rregull) të jenë transparente për Kuvendin e Kosovës.

Të kërkohet nga organizatori që të hiqet nga agjenda e bisedimeve me Beogradin çështja e decentralizimit. Kjo çështje të bisedohet vetëm me Bashkësinë Ndërkombëtare dhe me minoritetet në Kosovë pa përjashtim. Ose të përfshihen në bisedat për decentralizim të gjitha shtetet fqinje dhe të rajonit, kush është i interesuar e që kanë këtu pakicë e shumicë.

Delegacioni i Kosovës duhet të sqarojë, në takimin e ardhshëm, se pjesëmarrja e funksionarëve të Kosovës në delegacionin e Serbisë është e pakuptueshme dhe organizatori i bisedimeve të sqarojë se kjo situatë nuk mund të prejudikojë pozicionin e Kosovës sot dhe nesër.

Në bazë të rregulloreve në fuqi të IPVC-ve zyrtarëve të Kosovës që dëshirojnë dhe vazhdojnë të shërbejnë në delegacionin e Serbisë t’u plotësohet kjo dëshirë, por t’iu merret mandati dhe t’u ndërpritet financimi nga Buxheti i Kosovës.

Presioni ndërkombëtar i paarsyeshëm, i njëanshëm dhe mbi të gjitha në mirëbesimin e organizatorëve të bisedimeve për statusin, duhet të shpjegohet nga Grupi i Kosovës në mënyrë që Kosovës t’i jepen garancitë e nevojshme ndërkombëtare për ardhmërinë e vetë. Ndërsa Beogradi të thirret që të vendos paqe dhe fqinjësi të mirë me vendin tonë.

Me qëllim të funksionimit më të mirë të bëhet rregullorja e punës së Grupit të Statusit për funksionim normal, për arsye organizimi, efikasiteti, për nevoja, teknike dhe financiare dhe të sillet në Kuvend për njoftim ose për procedim të mëtutjeshëm.

Të plotësohen vendet në rrethin e dytë, që shpesh po quhet politik, të Grupit me përfaqësues që i cakton Kryesia e Kuvendit dhe Kryeministria.

Të ketë prezencë gjatë bisedave ndërkombëtare, në cilësinë e vëzhguesit edhe Kryetari ose përfaqësuesi i Komisionit Parlamentar për MN dhe IEA.