ZIKPRESS	Seanca plenare e Kuvendit të Kosovës

Diskutimi i deputetitit të Lëvizje Popullore të Kosovës (LPK), Emrush Xhemajli, në seancën plenare të Kuvendit të Kosovës, kushtuar standardeve për Kosovën

Prishtinë, 20 prill 2006

I respektuari kryetar i Kuvendit,

I nderuari Kryeministër,

Kolegë deputetë,

Pjesëmarrës në seancë,

Edhe pse materiali ka ardhur dje, pra shumë vonë, kam gjetur kohë dhe me vëmendje e kam lexuar materialin që po trajtojmë.

Në emër të Lëvizjes Popullore të Kosovës, që e përfaqësoj, shprehim gatishmërinë tonë për të ndihmuar për të mirën e vendit në përmbushjen e të gjitha standardeve për integrim dhe anëtarësim në Bashkimin Euripian dhe strukturat tjera Euroatlantike.

Ndërsa, këto Standarde për të cilat ne po flasim sot, në fakt, kurrë s’kanë qenë standarde, por e kundërta e tyre. Ato janë rregulla unikat e të pa zbatuara askund në botë në formën dhe mënyrën siç po veprohet në vendin tonë.

Nëse ju kujtohet këto rregulla patën disa emërtime. Standardet para Statusit, donë të thotë qerrja para atllarëve. U pa se kjo nuk shkon. Pastaj u emërtuan Standardet për Kosovën. Donë të thotë rregullat për Kosovën. Që me vetë emrin tregohet se nuk është fjala për Standarde universale, por është fjala për rregulla të posaçme për Kosovën.

Por, detyrat që përmenden në dokumentin që na është dorëzuar, por edhe në vlerësimet e mëhershme teknike të gjendjes në Kosovë kanë të bëjnë me detyra që i vihen një vendi që vazhdon t’i mohohet e drejta për t’u vetëqeverisur dhe për të ardhme të veten. Këto janë detyra që koordinojnë kompetencat e ndaluara e të rezervuara me ato kompetenca të përgjysmuara dhe në esencë që varen nga faktori jashtë IPVQ-ve (kështu ndodh po t’i referohemi secilit nga 8 kapitujt e detyrave të materialit që po shqyrtojmë). Dhe pikërisht pse ka të bëjë me koordinim të shumë pushteteve dhe paralelizmave, ato vështirë po koordinohen, sepse janë të përcjella me interesa që nuk janë të njëjta.

Kuvendi i Kosovë ligjet po i aprovon edhe ashtu këtë po e bënë ngadalë. Një pjesë e tyre, sidomos në fushën e pronës, të kulturës, gjuhës, privatizimit, të drejtat e pjesëtarëve të luftës çlirimtare, na është thënë ose të hiqen nga rendi i ditës, sepse hyjnë në kuadër të kompetencave të rezervuara ose të na vonohen në procedura duke ndërhyrë zyra ligjore e UNMIK-ut, apo të vonohen duke u nënshkruar nga PSSP-ja.

Ne, jemi duke bërë punë të shumëfishta. Shumica e këtyre rregullave që rregullojnë marrëdhëniet e shumë pushteteve paralele do të bien me ardhjen e statusit përfundimtar të Kosovës, çfarë do qoftë ai,  andaj në një mënyrë jemi  duke bërë punë sfilitëse të Sizifit.

I përgëzoj 4 Qeveritë e Kosovës që u kanë përballuar të gjitha sprovave rreth punëve që përshkruhen në dokumentet e afruara. Vetëm një popull që ka përvojë të madhe në robëri, si ky i yni, mund ta përballojë këtë gjendje karantine qe 7 vite me radhë.

Pjesa më e madhe e detyrave dhe rregullave që përshkruhen shihen në prizmin e rregullimit të statusit të veçantë të minoritetit serb. Ju lutem z. Kryetar, që në mbledhjen e ardhshme të shpërndahet edhe materiali për nivelin e plotësimit të të drejtave dhe standardeve jetësore edhe për shumicën e qytetareve të Kosovës që fatkeqësisht janë jashtë vëmendjes.

Jemi dëshmitarë se standardi i vërtetë, niveli i jetesës që u intereson të gjithëve në Kosovë, pavarësisht përkatësive e komuniteteve, është shqetësues dhe në rënie.

Standardet kanë kuptim vetëm nëse ndërrojnë drejtimin. Andaj propozoj që rekomandimi i Kuvendit të jetë që  standardet për Kosovën të shndërrohen në titull dhe përmbajtje në Standardet për integrim dhe anëtarësim në Bashkimin Evropian.

Ju faleminderit për vëmendje