ZIKPRESS

Çështje që deputeti i KK Emrush Xhemajli, kryetar i LPK-së, ngriti në Kuvendin e Kosovës në seancën plenare të 16 marsit 2006

Xhemajli: Kërkoj masa urgjente që z. Naser Shatri të lirohet sa më parë nga arresti i paarsyeshëm

I respektuari kryetar i Kuvendit,

Të nderuar të pranishëm

Para se të flas për rendin e punës më lejoni të them këtë:

Tash sa kohë në Austri është arrestuar nga Interpoli Naser Shatri me akuzat tashmë të njohura të Serbisë për terrorizëm. Naser Shatri ka qenë veprimtar politik në vitet 80-të dhe luftëtar i dalluar i UÇK-së në Zonën e Dukagjinit. Ngjashëm me Naserin ka qenë arrestuar edhe, tani Kryeministër i Kosovës Agim Çeku dhe z. Thaçi. Intervenimi adekuat për lirimin e tyre pati qenë i admirueshëm nga të gjithë ne dhe lirimi ka qenë gëzim i madh për Kosovën. Por, kështu nuk po ndodh për ushtarakët tjerë të UÇK-së. Do të ishte tragjedi që për fajin e mosangazhimit të institucioneve të Kosovës dhe UNMIK-ut që Naser Shatri të ekstradohej në Serbi. Mos harroni zotërinj se Anton Leka po gjykohet me pa të drejtë në Beograd vetëm pse ky i fundit dëshiron para botës të tregohet se ka sovranitet mbi Kosovën dhe i dënon e u bën çka të donë atyre qytetarëve të Kosovës që i zënë apo që ia servon Interpoli në formë të ekstradimeve duke u thirrur në ligje të vjetra që më nuk u përgjigjen rrethanave të tashme. Kush është për t’u dënuar, nëse është për t’u dënuar duhet të dënohet në Kosovë dhe jo në Serbi.

Më konkretisht, dëshiroj të dijë se çka kanë bërë deri më tash mekanizmat përkatës të qeverisë lidhur me këtë. Si deputet kërkoj masa urgjente që z. Naser Shatri të lirohet sa më parë nga arresti i paarsyeshëm. 

Dhe tani për rendin e punës,

Po e marr me mend se pika e Rendit të Punës, informatë e Grupit të Kosovës për Statusin e vendit nga Kryesia e Kuvendit është propozuar të shtyhet pa vend me arsyetimin tashmë të njohur të mospërgatitjes së Grupit për Informim sot këtu në seancë plenare.

Por arsyeja se nuk është bërë informata nuk qëndron. Ky grup po e shohim në media gjithnjë është i përgatitur. Jo vetëm për Kuvendin, por edhe për gjithë opinionin.

Pas çdo takimi që bëjnë jashtë e brenda hazer xhevap po u jep përgjigje mediave gjerë e gjatë dhe gjithnjë po janë të përgatitur. Për mendimin tim është e paarsyeshme shtyrja e mëtejme e kësaj pike të rendit të punës dhe kërkoj që të vijnë dhe të raportojnë, së paku afërsisht sikur para mediave.

Ndërsa në të ardhmen më mirë le të ulen dhe të punojnë raportin për organin që i ka zgjedhë e të ndërprenë shoun medial dhe lëvdatat pa mbulesë se si gjoja kanë pasur suksese të mëdha në bisedime.