ZIKPRESS

Diskutimi i deputetit të LPK-së, Emrush Xhemajli, në Kuvendin e Kosovës lidhur me  raportin për bisedimet e Vjenës

T’u pushojë dhe të mos u vazhdohet mandati personave që janë në grupin për Statusin

Prishtinë, 1 shtator 2006

Përshëndetje z. Kryetar i Kuvendit,

Anëtarë të grupit për statusin e vendit, z. Sejdiu, z.Çeku, e nderuara zonja karrige e zbrazët e zotit Thaçi, z. Surroi,

Ne, në Lëvizjen Popullore të Kosovës, kemi një mendim ndryshe nga ajo që zakonisht thuhet për temën që kemi sot.

Ju zotëri të grupit për Statusin e Vendit keni një mandatë të dyshimtë sa i përket bisedimeve për statusin e vendit. Edhe sot e kësaj dite nuk u dite kush votoi pro e kush kundër e kush u përmbajt kur u votua ne Kuvend ekipi për Statusin e vendit.

Ju keni hyrë në bisedime me Beogradin pa shprehur Serbia as më të voglën keqardhje për masakrat dhe okupimin në Kosovë. Për më tepër kjo ka ndodhur në kohën kur ajo vazhdon me shumë sukses luftën kundër Kosovës.

Ju e keni rehabilituar, legjitimuar dhe amnistuar Serbinë për krimet që ka bërë dhe e keni lënë gojëhapur kundërshtarin. Pse të kërkojë Serbia falje kur kjo nuk i kërkohet pikërisht nga ata që pa kurrfarë kushti janë ulur në tavolinë në anën tjetër. Pse Serbia të pranojë realitetin e krijuar në Kosovë dhe vullnetin e qytetarëve të Kosovës kur këtë nuk e ka kusht për marrëdhënie me Kosovën.

E inkurajuar Serbia tash po kërkon që Ahtisari t’i kërkoj falje Serbisë për ndonjë shprehje për Serbinë.

Me Beogradin ju po bisedoni në kundërshtim me vullnetin e popullit të Kosovës dhe të rezolutës së 17 nëntorit 2005 të Kuvendit të Kosovës, e cila ka deklaruar të panegociueshme Pavarësinë e Kosovës. Secili takim me palën serbe është duke e zbehur çështjen e pavarësisë sepse këto takime po reflektojnë mesazhe tragjike për Kosovën.

Viktima dhe agresori janë bërë një. Asnjë gjykatës në botë nuk do t’u zinte besë të dëmtuarit se nuk mund të jetojë bashkë me dëmtuesin kur bota i sheh bashkë çdo ditë si dy partner që kanë fituar status të njëjtë para gjykatës.

Ju keni dhënë mesazh të pasaktë dhe e keni hutuar edhe bashkësinë ndërkombëtare. Ju keni lënë përshtypjen se gjoja ka mundësi të negociohet e të bashkëjetohet edhe para pavarësisë së Kosovës me Serbinë. Dhe kur ju jeni sjellë kështu çka pritet prej të tjerëve sado miq që t’i kemi.

Nga Kuvendi keni pasur mandate të zbatoni 5 pilot njësi në baza të afrimit të shërbimeve më afër qytetarëve, ndërsa në kundërshtim me këto projekte edhe ashtu të dështuara, ju keni hyrë në tema tjera duke përdorur terminologjinë e decentralizimit. Ju më nuk po mund të dilni nga ujërat e ndarjes së vendit në baza territoriale e etnike duke u siguruar konflikt jo vetëm këtyre por edhe gjeneratave që ende nuk kanë lindur.

Ju nuk keni qenë në gjendje ose nuk keni dashur të sqaroni situatat dhe të mbani qëndrim para të caktuarve të OKB-së. Ju keni pranuar standarde e kritere të dyfishta, të dëmshme për vendin. Keni pranuar të diskutohet për lidhje vertikale të disa komunave të Kosovës me Beogradin që përbëjnë afërsisht 5 për qind të popullatës, që sipas disa ndërkombëtarëve qenka në rregull, standard, kriter dhe nuk keni qenë në gjendje të kërkoni lidhje vertikale për shumicën e banorëve të Kosovës, lidhje vertikale të Kosovës Lindore me Prishtinën, si dhe të Kosovës e Maqedonisë me Shqipërinë.

Duke mos reaguar ndaj dhunës policore që është duke ushtruar ndaj atyre që po protestojnë kundër jush, ju i jeni bashkangjitur kësaj dhune. Madje duke e kuptuar dëshirën tuaj për paqe të rrejshme në kohën kur ishte këtu Ahtisari policia i rrahu protestuesit edhe pasi i burgosi duke kryer vepra penale që dënohen edhe me ligje ndërkombëtare. Ju po e mbani këtë proces të negociatave pos me anashkalim të procedurave në Kuvend e mashtrim edhe me dhunë e të burgosur politikë.

Ju po i gënjeni qytetarët e Kosovës edhe pse vet e dini se nuk bëhet fjalë për pavarësi, por për status të vendit me tutorë.

Kosova po projektohet të jetë e pavarur po aq sa mund të jetë i pavarur një person i pavarur për veprim në kohën kur gjykatat e mjeku i caktojnë disa persona të tjerë tutorë për t’u kujdestar e për të marrë vendime në emër të tij.

LPK propozon që t’u pushojë dhe të mos u vazhdohet mandati personave që janë në grupin për Statusin.

Për t’u realizuar vullneti i qytetarëve të Kosovës, pika e parë duhet të pezullohen të gjitha bisedimet me Beogradin dhe me Serbinë.

Të organizohet referendum në Kosovë për statusin politik të vendit.

Pas Referendumit për Kosovën të vazhdojë dialogu me ata që do ta respektonin vullnetin e popullit të Kosovës.

Të vendosen raporte të sinqerta në pajtim me vullnetin e popullit të Kosovës me bashkësinë ndërkombëtare, të cilat deri më tash nuk janë të tilla.

Në fund kërkoj që të votohen në Kuvend propozimet e deputetëve Bislimi, Gjergj Dedës dhe propozimet e mia me votim elektronik.

|  kthehu  |