Kemi qenë kundër pjesëmarrjes - bashkëqeverisjes të PDK-së, AAK-së dhe LDK-së dje, sikurse të AAK-së dhe LDK-së sot 

Luzern, dhjetor - Të shtunën në Luzern, nën drejtimin e Murat Bytyqit, kryetar, është mbajtur mbledhja e Kryesisë së Degës së Lëvizjes Popullore të Kosovës për Zvicër. Situata politike në Kosovë dhe në trojet shqiptare në Kosovën Lindore e Maqedoni dhe situata organizative e Degës së LPK-së për Zvicër ishin tema kryesore që u diskutuan në këtë mbledhje. “Kaloi fushata zgjedhore, rezultatet dihen. Në kuadër të kësaj edhe LPK-ja e ka vendin e saj, megjithëse do të duhej të kishte më shumë vende në parlament, pasi që është forcë që ka merita të pakontestueshme. Qeveria e formuar nga AAK-ja dhe LDK-ja është Qeveri e përputhjes së interesave”, ka konstatuar në fjalën e tij hyrëse, kryetari Murat Bytyqi. Sa i përket koalicionit bashkëqeverisës ndërmjet LDK-së dhe AAK-së, Kryesia e LPK-së në Zvicër ka ripërsëritur edhe njëherë qendrimin se “kemi qenë kundër pjesëmarrjes - bashkëqeverisjes së PDK-së, AAK-së dhe LDK-së dje, sikurse të AAK-së dhe LDK-së sot”.

Në vazhdim të mbledhjes është diskutuar edhe për situatën politike në trojet shqiptare në Kosovën Lindore e Maqedoni, me ç’rast është konstatuar se LPK –ja duhet të përcjellë zhvillimet atje dhe të reagojë konform interesave jetike dhe legjitime të shqiptarëve. Për këtë çështje ka ngritur shqetësimin e tij anëtari i Kryesisë Murat Jashari.

Në pjesën e dytë të mbledhjes, është debatuar për gjendjen organizative të Degës së LPK-së për Zvicër dhe është marrë vendim që Këshillat e LPK-së të hartojnë programet e punës dhe veprimtarisë së aktivitetit njëvjeçar, si dhe konform statutit të kryhen detyrimet për vitin 2004, më së largu deri në fillim të muajit shkurt të vitit 2005.

Zyra për informim e LPK-së

Fillojnë përgatitjet për shënimin e 23-vjetorit të themelimit të LPK-së

Prishtinë, 12 dhjetor - Kompletimi i projektvendimeve të propozuara nga Këshilli i Përgjithshëm, konkretizimi i qendrimit opozitar të LPK-së, përkatësisht marrëdhëniet me Qeverinë dhe opozitën, si dhe caktimi i datës së mbajtjes së mbledhjes së ardhshme të Këshillit të Përgjithshëm, kanë qenë disa nga pikat kryesore të mbledhjes së Kryesisë së LPK-së, e cila është mbajtur të shtunën në Prishtinë, nën drejtimin e kryetarit Emrush Xhemajli. Anëtarëve të Kryesisë fillimisht u është prezentuar raporti me shkrim për gjendjen në Këshillin e Përgjithshëm, të përgatitur nga sekretari i përgjithshëm Gafurr Elshani.

Një pjesë e madhe e diskutimeve është orientuar në gjetjen e formave për tejkalimin e problemeve financiare me të cilat po përballet LPK-ja, me ç’rast nga disa anëtarë të Kryesisë janë dhënë propozime konkrete se si mund të tejkalohet kjo situatë. Një vend me rëndësi në këtë mbledhje i është kushtuar rolit dhe qendrimit të LPK-së si subjekt parlamentar opozitar. LPK-ja do të vazhdojë të jetë opozitë e mirëfilltë dhe si e tillë do të bashkëpunojë me subjektet tjera opozitare deri në kufirin e interesave të përbashkëta, ndërkohë që do të përkrahen dhe mbështeten vendimet pozitive të Qeverisë, kurse do të kundërshtohen pa hezitim ato veprime të pozitës që i sjellin dëm interesit të gjithmbarshëm kombëtar.

Kryesia, në fund, caktoi mbajtjen e mbledhjes së radhës të Këshillit të Përgjithshëm më 22 janar të vitit 2005, ndërkohë që u vendos që të fillojnë parapërgatitjet për shënimin e 23-vjetorit të themelimit të LPK-së.

Zyra për informim e LPK-së

LPK-ja do të vazhdojë të luaj rolin e një opozite konstruktive, dhe do të angazhohet për shpalljen e pavarësisë së Kosovës

Prishtinë, 8 dhjetor - Zhvillimet e fundit në skenën politike të Kosovës, qendrimi i LPK-së ndaj institucioneve të reja të dala nga zgjedhjet e fundit si dhe qendrimi i këtij subjekti ndaj të ardhmës së misionit të UNMIK-ut, ishin disa nga temat kryesore që janë trajtuar në takimin që kanë zhvilluar drejtuesit e LPK-së me përfaqësuesin e njësisë për analiza dhe hulumtime strategjike pranë zyrës së PSSP-së, z. Ardian Arifaj. Sekretari i përgjithshëm i LPK-së, Gafurr Elshani dhe sekretari për marrëdhënie me publikun, Demir Reshiti, për rreth një orë kanë biseduar me përfaqësuesin e zyrës së UNMIK-ut për analiza dhe hulumtime strategjike, me ç’rast kanë shprehur qendrimet e LPK-së ndaj zhvillimeve të fundit në skenën politike të Kosovës. “Ne kemi kundërshtuar kandidimin e z. Rugova për postin e presidentit të Kosovës, dhe arsyet e këtij kundërshtimi i ka paraqitur deputeti i LPK-së në mbledhjen konstituive të Kuvendit, ndërsa sa i përket kabinetit qeveritar, ne nuk do të nxitohemi që paraprakisht të profetizojmë nëse do të ketë sukses ose jo”, është shprehur Elshani, duke sqaruar se për fat të keq përbërja e kaluar e qeverisë ka dështuar pikërisht për shkak të koalicionit të gjërë qeverisës dhe mungesës së një opozite të mirfilltë. “LPK-ja do të vazhdojë të luaj rolin e një opozite konstruktive, dhe do t’i përkrah e ndihmoj të gjitha nismat që qeveria e Kosovës i merr në interes të popullit të Kosovës, ndërkohë që do të angazhohemi për shpalljen e pavarësisë së Kosovës nga kjo përbërje e Parlamentit, në mënyrë që të krijohet një bazë ligjore për avansimin e mëtejmë dhe zgjidhjen përfundimtare të statusit të Kosovës”, kanë thënë drejtuesit e LPK-së. Në takim është biseduar gjithashtu edhe për presionet që po bëhen nga anë të ndryshme e sidomos nga Beogradi ndaj kryeministrit Haradinaj i cili po kërcënohet me dërgim në gjykatën për krime lufte në Hagë. Sekretari i përgjithshëm i LPK-së, Gafurr Elshani, ka tërhequr vërejtjen se tendencat për ta dërguar kryeministrin Haradinaj në Hagë dhe për ta barazuar luftën e drejtë çlirimtare të UÇK-së me krimet e okupatorit serb, jo vetëm që nuk do ta ndihmojnë ecjen përpara të proceseve politike në Kosovë, por përkundrazi, mund të nxisin revolta dhe pakënaqësi në radhët e popullsisë shqiptare e cila edhe ashtu është duke u përballur me një mori problemesh ekonomike.

Zyra për informim e LPK-së

Xhemajli u ka bërë thirrje deputetëve që të zgjedhin një kryetar tjetër të Kosovës në vend të z. Ibrahim Rugova

I nderuari zoti Kryesues,

Të nderuar zotërinjë deputetë,

Më lejoni në fillim që përbërjes së tashme të Kuvendit të zgjedhur t’i dëshiroj punë të mbarë.

Lidhja Demokratike e Kosovës sipas rezultateve të zgjedhjeve dhe marrëveshjeve me partnerët e koalicionit e ka fituar të drejtën për të propozuar para nesh kandidatin për kryetar të Kosovës.

Kandidatura e z. Rugova që u paraqit duhet të bie për arsye se ai në veprimtarinë e tij nuk është treguar i përgjegjshëm para organeve që e zgjedhin, si në vitet 90-të para lufte, si gjatë lufte, si pas saj. Ai nuk përfaqësoi dhe nuk përfaqëson unitetin e popullit..., siç e kërkon ky post.

Z. Rugova, siç dihet, publikisht UÇK-në dhe forcat politike që kanë qëndruar prapa saj i ka kundërshtuar dhe i ka quajtur në mënyrë të përsëritur krijesa të Serbisë.

Ndërsa, siç dihet, gjithashtu publikisht, gjatë kohës së luftës zotëri Rugova ka takuar kreun e agresionit serb, Millosheviqin dhe Millutinoviqin. Njëkohësisht ka kërkuar ndaljen e bombardimeve të NATO-së kundër caqeve serbe në kohën kur këto të fundit kryenin masakra mbi popullin e Kosovës.

Në fillim të mandatit të kaluar legjislacioni i Kosovës e obligonte atë që të ushtronte vetëm postin e kryetarit të Kosovës duke lënë postin partiak, për të qenë kryetar i të gjithëve, ndërsa ai përsëri preferoi të jetë kryetar vetëm i anëtarëve të LDK-së.

Më 14  tetor 2003, z. Rugova ka shkuar në Vjenë për të biseduar me përfaqësues të Beogradit pa marrë pëlqimin e Kuvendit.

Zotëri Rugova ka paraqitje jo serioze para përfaqësuesve ndërkombëtarë. Atyre u kërkon njohjen "formale" të pavarësisë së Kosovës në kohën kur, edhe për mospunën e tij, vendit tonë nuk i është rregulluar dokumentacioni i pavarësisë dhe rrjedhimisht ndërkombëtarët nuk kanë pasur çka të njohin "formalisht" kur nuk u është dhënë asnjë dokument me shkrim i instituconeve të Kosovës.

Për arsyet e cekura më lartë unë do të votojë kundër kësaj kandidature duke i ftuar edhe deputetët tjerë që të bëjnë të njëjtën gjë. Njëherit ftojmë LDK-në që të paraqesë një kandidaturë tjetër për shqyrtim dhe votim.

(Prishtinë, 3 dhjetor 2004)