Diskutimi i deputetit të LPK-së, Emrush Xhemajli, lidhur me buxhetin e Kosovës për vitin 2006

Prishtinë, 15 dhjetor 2005

I nderuari Kryetar i Kuvendit,

I nderuari Kryeministër,

Të nderuar kolegë deputetë,

E përgëzoj qeverinë dhe veçanërisht Ministrinë përkatëse që ka sjellë në Kuvend për shqyrtim shumë më herët se herën e kaluar projektbuxhetin e Kosovës për vitin vijues.

Të gjithë neve dhe në veçanti qeverinë duhet ta shqetësojë gjendja në rënie e buxhetit të Kosovës. Në kushtet e tashme me këtë buxhet nuk mund të flasim për perspektivë të mirë dhe për zhvillim.

Është për të shqetësuar një buxhet që të hyrat nga tatimet e brendshme mezi kapin shumën 126 milion, ndërsa dogana vazhdon të jetë burimi kryesor i Buxhetit të Konsoliduar të Kosovës prej 425 milion Euro.

Fuqitë e rezervuara me buxhetin e varfër por zemërgjere të Kosovës ndaj tyre punojnë pa pyetur askënd me hiq më pak se 200 milion Euro kundrejt Qeverisë që i mbeten të punojë me 330 milionë.

Sikurse të ishte ndjekur një praktikë e stimulimit më të madh të prodhimit vendor, edhe ashtu të vogël, dhe të shikohen më mirë se si sillen tatimmbledhësit ndaj tyre, dhe në anën tjetër të ndaleshin veprimtaritë e jashtëligjshme që dëmtojnë ekonominë do të ishte një situatë tjetër buxhetore. Por, si duket, Qeveria jonë ka pasur shumë vështirësi e shqetësime që i ka shkaktuar vetës dhe shumë standarde për të plotësuar që i kanë vënë nga jashtë dhe nuk ka pasur kohë të thellohet në politikat që rrisin buxhetin e vendit.

Në bazë të Projektbuxhetit të afruar AKM-ja është njëra nga shpenzuesit më të mëdha buxhetor edhe për vitin 2006. Pjesa e mjeteve që i janë ndarë Privatizimit  mbi 3 milion e 300 mijë euro është e panevojshme që të merren nga Buxheti i Konsoliduar i Kosovës. Tashmë janë privatizuar shumë ndërmarrje për çka AKM-ja ka marrë mjetet nga shitja. Për këto mjete nuk ka kurrfarë transparence. Mendoj se një pjesë e këtyre mjeteve duhet të ndahen që të vazhdojë privatizimi i mëtejmë. Ndërsa shuma e cekur më larte e Buxhetit të Konsoliduar t'i kalojë Ministrisë së Punës dhe Mirëqenies sociale dhe të dedikohen me zë të veçantë për familjarët e dëshmorëve, dhe invalidët e luftës së UCK-së, meqenëse ndërkohë po shpresojmë se nuk do të sabotohet më tutje nxjerrja e ligjit për kategoritë e mësipërme.

Siç nuk është e drejtë forma e tashme e pushtetit lokal po kaq e padrejtë është edhe ndarja e granteve për komunat e tashme. Kjo ndarje është në dëm të komunave me numër më të madh të banorëve.

Të gjithëve na kujtohet debati për reformimin e pushtetit lokal. Atëbotë qe thënë se pilot komunat nuk kanë implikime buxhetore sepse ato deri sa të jenë pilot do t'i financojë bashkësia ndërkombëtare. Unë jam befasuar kur kam parë në Projektbuxhetin e Konsoliduar të Kosovës se këto pilot eksperiment projekte i janë vënë në barrë buxhetit të Kosovës i cili edhe ashtu ka pësuar rënie.

| kthehu |